التقط ميكرفون وكالة الأنباء الرسمية حديث جرى على مدخل الوافدين في مطار "الشهيد الدولي" بين أحد المغتربين الواصلين وبعض سائقي الإجرة:فور خروج المغترب من باب المطار محملاً حقائبه إقترب إليه سائقي سيارات إجرة...
سائق إجرة ١: الحمد لله على السلامة...
سائق إجرة ٢: الحمد لله على السلامة استاذ
سائق إجرة ١: الحمد لله على السلامة تاكسي؟
المغترب: لأ شكراً
سائق إجرة ١: طيب أنا بأخذك بس لوين واصل؟
المغترب: شكراً يا أخ بس مش عايز...
سائق إجرة ١: ليك، ٥٠ دولار مطرح ما بدك بضواحي العاصمة... يالله طلاع!
المغترب: يا خيي مش رايح مطرح!!!
سائق إجرة ٢: ولك لوين واصل؟ سؤال سألك إياه الشاب!
سائق إجرة ١: لوين واصل؟ شو ما بدك تجاوب؟
سائق إجرة ٢: شو هيئته سر! ما تكون رايح تعملك شي عمله مش منيحة...
سائق إجرة ١: لوين واصل ولاه؟!
المغترب: يا خيي مش واصل لمطرح! جاي صهري يأخذني. راح يجيب سيارته من باركينج المطار!
سائق إجرة ١: طيب شفت؟ بس تبقى جاوب بس يسألك الواحد سؤال... يا مهذب!
سائق إجرة ٢: شعب زفت!
سائق إجرة ١: مثل قفا "الصرماية" البعيد!
سائق إجرة ٢: استغفر الله العظيم...
سائق إجرة ١: وحد الله!
سائق إجرة ٢: (صمت)
سائق إجرة ١: وحدت الله؟
سائق إجرة ٢: يا خيي وحدته!
سائق إجرة ١: إيه لأنو ما سمعتك...
سائق إجرة ٢: إيه ما أنا بوحده بقلبي
سائق إجرة ١: ماشي. أنا رايح على الصلاة. بدك شي؟
سائق إجرة ٢: لا الله معك. الحمد لله على السلامة استاذ. تاكسي؟ وين واصل؟
1 comment:
Post a Comment